Gin-anunsyo ni President Ferdinand Marcos Jr nga ginkanselar sang Department of Foreign Affairs ang passport ni anay Ako Bicol Partylist Rep Zaldy Co, isa sa mga gina-imbestigaran may kaangtanan sa flood control project anomaly.
Suno kay Marcos, iya ginmanduan ang Department of Foreign Affairs kag Philippine National Police nga magkoordinar sa mga embahada sang Pilipinas agud masiguro nga indi na magamit ni Co ang kanselado nga passport agud makalikaw sa kaso.
Kabahin man sang koordinasyon ang gilayon nga pagreport sa tion nga magtinguha si Co nga magsulod sa iban nga pungsod agud gilayon nga mapatigayon ang iya repatriation pabalik sa Pilipinas.
Ginkumpirmar man sang Presidente nga nagapabilin sa kustodiya sang NBI si Sara Discaya nga gina-imbestigaran sa amo man nga kaso matapos nga nagsungka ini kahapon bisan wala pa sang gin-isyu nga arrest warrant batuk sa iya.
Ginpasalig ni President Marcos nga matalunsay ang dalagan sang proseso kag magapangatubang sang hustisya ang mga imbolbado sa ginaalegar operasyon kag konspirasyon sa likod sang kwestyonable nga flood control projects.
Padayon pa suno sa iya ang imbestigasyon kag pagpasaka sang kaso agud mapanabat ang mga responsable kag mabawi ang pundo sang publiko nga ginapatihan na-usikan sa anomaliya.
