ROXAS CITY – Linibo ka mga deboto ang nagtambong sa tuigan nga Pasyon ni Kristo sa banwa sang President Roxas, Capiz.
Indi lamang mga deboto nga pinoy kag katoliko ang nagsaksi diri bangud nakita ang presensiya sang pila ka mga turista nga nagakuha sang litrato kag video sang nasambit nga aktibidad.
Una nga ginpatigayon ang 1st part nga Pasyon play sa Civic center sang President Roxas kag ginpadayon ang 2nd part sa Sitio Boac cemetery, sa diin nahinabo ang pagtaltal.
Ginkalipay ni Monsignor Alden Bolivar, parish priest sang St. Joseph the Worker ang naangkon nga kadalag-an sang nasambit nga aktibidad, bangud indi lamang luha ang nangin puhunan sang organizer kag cast sang Pasyon ni Kristo sa sulod sang pila ka bulan nga preparasyon kundi kalakip na diri ang dedikasyon kag kabakud sang buot.
Ginpabugal man ni Bolivar nga sa probinsiya sang Capiz nagaisahanon lamang ang banwa sang President Roxas nga nagpatigayon sang tuigan nga Pasyon ni Kristo, tagsa ka Semana Santa.
Nagalaum ini nga pinaagi sa aktibidad, matatak sa kaisipan sang tanan ang gin-agihan nga kasakit, pagkamatay kag pagkabanhaw ni Hesus nga nagpakatawo para maluwas ang tanan nga kasal-anan sang tawo sa bilog nga kalibutan.
Nahibaluan nga ini ang ika-43 ka tuig sang Pasyon ni Kristo nga una ginsuguran sang tuig 1975.
