Patay ang isa ka babaye matapos ginapahayag nga nagbungguanay ang iya sini ginamaneho nga angkar-angkar sa isa ka motorsiklo sa dalanon sang Sitio Baclayan, Barangay Yatingan, Pontevedra, Capiz.
Ginkilala ang biktima kay alyas “Raquel”, yara sa legal nga pang-edaron kag residente sang nasambit nga lugar, samtang ang drayber naman sang motorsiklo ang ginkilala kay alyas “Cresenciano”, 51-anyos kag residente sang Brgy. Poblacion Ilizalde, Pres. Roxas, Capiz.
Sa interview sang Bombo Radyo kay PSSG. Isaiah Don Bornales, Imbestigador sang Pontevedra MPS, ginpahayag sini nga naguwa sa ila nga imbestigasyon nga naglapaw sa linyada sang dalan si alyas “Raquel” rason nga bumunggo ini sa kasugata sini nga motorsiklo.
Dugang pa sini, bangud sang makusog nga impak sang pagkabunggo ni alyas “Raquel” nagtalbo ini kag nag-angkon sang patal nga pilas sa ulo.
Gilayon naman nga nagrespondehan ang mga otoridad apang sang ginadapatan na sang pagbulong si alyas “Raquel”, gindeklarar ini nga ginbawian sang hulam nga kabuhi.
Samtang, si alyas “Cresenciano” kaupod ang iya mag-iloy nga angkas, yara na sa estable nga kondisyon.
Mahibaluan, nga wala sang suga ang ginamaneho ni alyas “Raquel” nga angkar kag madulom ang dalanon sa ginluntaran sang aksidente.
Sa karon, yara na sa isa ka punerarya ang bangkay ni alyas “Raquel” kag wala naman sang pagaatubangon nga kaso si alyas “Cresenciano”.
