Dead on arrival nga ginpadangat sa ospital ang isa ka lalaki, matapos ginaalegar nga ginbuno sa Sitio Malogo, Barangay Batiano, Mambusao, Capiz.
Ginkilala ang biktima kay alyas “Botbot”, yara sa legal nga pang-edaron kag residente sang nasambit nga lugar.
Sa nakuha nga impormasyon sang Bombo Radyo nagikan sa Mambusao MPS, sa inisyal nga imbestigasyon ginpahayag nga samtang nagapauli na kun tani si alyas Marjorie, isa ka concerned citizen, nadiparahan sini ang pila ka serye sang dugo padulong sa isa ka balay.
Apang, sang ginsunod sini ang nakita nga pila ka mga serye sang dugo, nasapwan nalang sini sa sulod sang puluy-an ni alyas Mayline nga nagakaya-kaya na ang amo nga biktima nga may samad sa tiyan nga ginaalegar nga tuga sang pagpangbuno.
Gilayon naman nga ginpadangat sang pamilya ang amo nga biktima sa ospital apang, gindeklarar ini nga dead on arrival sang nag-atendir nga doctor.
Sa karon, yara na ang bangkay sang biktima sa isa ka punerarya sa nasambit nga banwa samtang, nagapabilin naman nga at large ang wala pa makilan-an nga suspek.
