ROXAS CITY – Alerto ang Philippine Coast Guard (PCG) sa pagbantay sa mga pantalan kag naka “heightened alert” status bilang preparasyon sa pagdagsa sang mga pumuluyo nga magapauli sa probinsya sang Capiz kadungan sang pagselebrar sang semana santa sa masunod nga semana.
Sa interview sang Bombo Radyo kay CG Senior Chief Petty Officer Allan Mandado sang Philippine Coast Guard – Capiz, suno diri, 24/7 nga naga-monitor ang katapo sang PCG sumugod sang Abril 4 tubtob sa Mayo 31, 2022.
Ginpahayag man ni Mandado nga may yara sang personnel nga iga-deploy sa kada ports sa maga-abot kag maga-halin nga barko.
Dugang pa sini, gina-inspection kag gina-supervise sang PCG ang pag-abot kag paghalin sang mga pasahero agud mapabilin nga matawhay kag hilway ang sitwasyon.
Gina-ekspektar man sang opisyal nga magadagsa ang mga pumuluyo sa adlaw sang Miyerkules kag Huwebes Santo bangud sa paghalug sang mga restrictions sa pagbiyahe.
