Hugot nga nagapanindugan ang hepe sang Cuartero MPS nga wala sila kakulangan sa pagproseso sang mga dokumento may kaangtanan sa kaso batuk kay Clyde Ortencio.
Matandaan nga ginbasura sang Office of the Provincial Prosecutor ang kaso nga Reckless Imprudence resulting to Homicide nga ginpasaka sang Cuartero Municipal Police Station batuk kay Ortencio.
Sa interview sang Bombo Radyo kay PCPT. Alladen Talaban, hepe sang Cuartero PNP, ginpahayag sini nga wala sila sang kaangtanan sa desisyon sang piskalya nga pagbasura sang kaso kag nakibot na lamang ang mga ini sang ila nahibaluan.
Sa ginpaguha nga desisyon sang Provincial Prosecutor Office, nakabase ini sa paghimay-himay sang panghitabo sa adlaw sang aksidente kag ang pagbusisi sa mga dokumento nga hawid sang driver sang tricycle.
Gani, pahayag pa ni Talaban nga ginhimo lamang nila ang ila obligasyon bilang pulis nga imbestigaran kag ipasaka ang nasambit nga kaso kag indi sila otorisado sa pagpanghimasok sa nasambit nga kaso.
Panugyan sang hepe nga kun mahimo likawan ang pagmaneho nga wala sang lisensya agud malikawan ang kasubong nga insidente.
