ROXAS CITY – Gintugyan na lamang ni Capiz Police Provincial Office (CPPO) Provincial Director Police Colonel Julio Gustilo Jr. kay Police Lieutenant Colonel Ricardo Jomuad Jr., ang hepe sang Roxas City PNP ang direktiba sa pagsolbar sa isyu sa deployment sang mga kapulisan sa strategic lugar sa siyudad.
Suno kay Gustilo nga pag-abot sini sa probinsiya, naka-pullout na ang mga kapulisan nga nakadeploy sa Barangay Cagay, sining syudad.
Aminado si Gustilo nga may nabaton ini nga sulat nagikan sa mga punong barangay nga ang kaundan amo ang katuyuan sang mga ini nga mapabalik sa Barangay Cagay ang deployed nga mga kapulisan agud mapabilin ang kalinong kag katawhay sa lima ka mga kabarangay nga ginalakipan sang Barangay Cagay, Sibaguan, Dinginan, Balijuagan kag Talon.
Bangud diri suno sa opisyal, iya ginpalab-ot kay Jomuad ang sulat agud matun-an ang deployment sang mga kapulisan.
Suno kay Gustilo nga sang siya pa ang nagapungko nga hepe sang Roxas City PNP, iya gintinguhaan nga mapahamtangan sang outpost ang Barangay Cagay nga magaserbe nga center post sa mga kaiping nga mga kabarangayan.
Sa ulihi ginpahayag sang opisyal nga nakadepende kay Jomuad ang mangin desisyon natuhoy diri pinaagi sa iya nga pagpakighinala sa mga opisyales sang nasambit nga mga barangay.
Samtang yara naman suno diri sa diskresyon sang isa ka chief of police ang pagdesisyon kun nagakadapat nga ipull-out kag isaylo ang deployment sang ila mga kapulisan bisan pa nga nagmandu ang local chief executives.
