WESTERN VISAYAS, PHILIPPINES- Ginpakigbahin sang Philippine Drug Enforcement Agency (PDEA) Region 6 nga 1,959 sa 3,389 ka mga barangay sa Western Visayas, ukon kabaylo sa 96.37%, ang gindeklarar bilang drug-cleared base sa pinaka-ulihi nga datos tubtob Hunyo 30, 2025.
Sa kabilugan, 3,270 sa 3,389 ka mga barangay sa Rehiyon 6 ang napamatud-an na nga drug-cleared, kalakip ang tanan nga barangay sa Aklan, Antique, at Guimaras. Ang probinsya sang Iloilo may 99.59% nga drug-cleared rate, kun sa diin pito (7) na lang ka mga barangay ang indi pa na-clear. Sa Capiz, may 93.45% clearance rate kag 31 nga mga barangay pa ang nagahulat sang clearance. Samtang sa syudad sang Iloilo, 52.78% pa lang sang mga barangay ang na-clear, kag 85 pa sa 180 nga barangay ang indi pa pwede nga ideklarar nga drug-cleared.
Sa interview sang Bombo Radyo kay Ma. Graziella Tanaleon, tigpamaba sang PDEA 6, iya ginpahayag nga may yara sang nagdugang nga apat ka drug cleared barangay kag amo ini ang Brgy. Timpas sa Panit-an, Capiz; Brgy. Bayuyan sa Estancia, Iloilo; kag duwa ka barangay sa syudad sang Iloilo— ang Brgy. Yulo Drive, Arevalo kag Brgy. Katilingban, Molo.
Importante nga tandaan nga indi direkta nga maikumparar ang mga datos sang 2024 kag 2025 bangud sa mga pagbag-o sa rehiyon. Sang 2024, kalakip sa report sang PDEA-6 ang mga barangay nagikan sa Negros Occidental kag Bacolod City nga anay kabahin sang Western Visayas apang sa karon kabahin na sang Negros Island Region (NIR) bangud sa administrative restructuring. Bangud sini, nagnubo ang kabilugan nga numero sang mga barangay sa Rehiyon 6 nagikan sa 4,051 sang 2024 kag nangin 3,389 na lang subong nga tuig.
Suno kay Tanaleon, ang isa ka barangay nga iga-deklarar bilang drug-cleared kinahanglan nga makapasar sa mga kriteriya sang Dangerous Drugs Board. Kalakip na diri ang pagkadula sang illegal nga droga, mga drug pusher, drug user, suppliers, financiers, mga drug manufacturers, kag pagtanom sang marijuana sa lugar. Kinahanglan man nga makapasar ang mga barangay sa pag-usisa sang Department of Health (DOH), Department of the Interior and Local Government (DILG), kag Philippine National Police (PNP), nga kabahin sang oversight committee sa clearing process.
Dugang pa ni Tanaleon, ang status sang isa ka drug-cleared barangay ang indi permanente. Kinahanglan nga mamintinar kag masuportahan ang katinlo batok sa illegal nga droga. Kun may mga valid nga report nga liwat may presensya sang illegal nga droga sa isa ka barangay, mahimo ini nga mangin basehan agud bawi-on ang ila nga drug-cleared status.
Ginsiguro sang PDEA-6 nga padayon ang ila nga pagpaninguha kaupod ang iban pa nga ahensya sang gobyerno agud dalayon nga matinlo ang rehiyon halin a impluwensya sang ilegal nga droga.
