Nagahanda na sang bulig ang gobyerno para sa mga residente nga posible nga maapektuhan sang Bagyong Julian partikular na sa parte sa extreme Northern Luzon.
Sa karon, naka-monitor gihapon ang National Disaster Risk Reduction and Management Council (NDRRMC) sa hulag sang bagyo nga nagahulag paguwa sang pungsod.
Sa isa ka situational report nga ginpaguwa sang NDRRMC, may masobra nga P1.9 milyon nga family food packs nga may balor nga P1.48 bilyon kag iban pa nga mga food items nga nagabalor P276 milyon ang ginahanda na sang Department of Social Welfare and Development (DSWD) kun gulpi nga magbaha ukon anuman nga mga insidente tuga sang Bagyong Julian.
May mga non-food items man nga may balor nga P919 milyon nga nakahanda agud ipanagtag sa mga posible nga magakinahanglan nga mga residente sa mga apektado nga lugar.
Naghanda man ang ahensya sang Quick Response Fund (QRF) nga nagabalor sang P123 milyon kag standby fund nga P171 milyon para sa iban pa nga kinahanglanon sang mga naulamid ni Julian kun mag-landfall na ini sa Pilipinas karon sa gabi ukon buwas sang kaaganhon.
Samtang, sa Batanes naman naghatag na sang advisory ang Provincial Disaster Risk Reduction and Management Office (PDRRMO) sa mga residente nga higtan na ang tagsa ka mga atop at maghanda na sa ginalauman nga landfall ni Julian sa rehiyon base sa State Weather Bureau.
Sa karon, wala pa nag-anunsyo sang preemptive evacuation ang probinsya bangud light to moderate rains pa lang ang nababatyagan sa lugar.
Sa pihak nga bahin, ginkumpirmar ni Cagayan PDRRMO head Ruelie Rapsing nga nag-deploy na sang mga personnels ang ahensya agud madasig nga makadul-ong sang serbisyo kag bulig sa posible nga emergency sa lugar.
