Nakapagkit ang Pilipinas sang pinakamahinay nga inflation rate ukon pagtaas sang pangkalabilugan nga lebel sang presyo sang mga balaklon kag serbisyo sa pungsod sang bulan sang Mayo makaligad ang kapin anom ka tuig ukon umpisa sang November 2019.
Sa isa ka press conference nga ginpatigayon, ginpakigbahin ni Dennis Mapa, Undersecretary kag National Statistician sang Philippine Statistics Authority (PSA) nga nag-untat ang inflation sa nakaligad nga bulan sa 1.3%. Mas mahinay ini gikan 1.4% nga napagkit sang Abril subong nga tuig, kag 3.9% sang Mayo 2024.
Nagdala man ini sa average inflation sa una nga lima ka bulan sang 2025 sa 1.9%.
Paathag sang PSA chief nga ang mas mahinay nga inflation ang tuga sang mas mahinay nga pagtaas sang mga presyo ukon renta sang balay, tubig, elektrisidad kag iban pa nga presyo sang langis nva naghinay sa 2.3%.
Naka-amot man sa pagnubo sang inflation ang mas mahinay nga pagtaas sang presyuhanay sang mga serbisyo sa restaurant kag accommodatiion nga yara sa 2% sang Mayo.
Pag-abot man sa food inflation, nagapabilin ini nga yara sa 0.7% sang Mayo, kun sa diin dako ang gin-nubo sini gikan sa 6.1% nga narekord sang Mayo sang tinalikdan nga tuig. Samtang, suno sa PSA, sulod man sa gihapon ang inflation rate sang Mayo sa ginabulubanta sang Bangko Sentral ng Pilipinas (BSP) gikan sa 0.9% tubtob 1.7%.
Target man sang economic managers sang Marcos administration nga mapabilin ang inflation sa 2% tubtob 4% subong nga tuig.
