Gindeploy sang Philippine Navy ang ila mga suldado sa pila ka mga lugar sa Palawan agud magbulig sa pag-evacuate sang linibo ka mga residente nga naabtan sang tubig baha.
Suno sa PN, nagsabat ang mga personnel sang 311th Marine Company, Marine Battalion Landing Team-11, kag 3rd Marine Brigade sa distress calls sang pila ka local disaster offices sa probinsya.
Nagpadulong ang mga ini sa pila ka mga barangay nga nalumos sa baha, ilabi na ang mga coastal areas sa El Nido.
Tubtob subong, naka-deploy pa ang navy personnel sa nagkalain-lain nga bahin sang Palawan samtang nagapadayon ang pagbakwit sang mga pamilya.
Base sa ginpaguwa nga report sang Provincial Disaster Risk Reduction Management – Palawan, nagdangat na sa 2,217 ka mga pamilya ang na-identify nga apektado sang malapnagon nga pagbaha sa nagkalain-lain nga lugar. Ini ang ginabug-usan sang kabug-usan nga 9,946 ka mga tawo.
Nagapabilin naman nga bukas ang pila ka mga evacuation centers sa probinsya. May kabug-usan nga 5,856 ka mga indibidwal ukon katumbas sang masobra 1,440 ka mga pamilya ang temporaryo nga nagapuyo diri.
Mas ginpili naman sang iban pa nga natumod nga apektado nga mag-istar temporaryo upod sa ila mga himata kag kakilala samtang nagapadayon ang pagbaha.
Padayon pa nga gina-verify ang isa ka indibidwal nga ginreport nga missing, lakip na ang isa ka bata nga gin-alegar napatay sa tunga sang pagbaha.
