ROXAS CITY – Ginklaro sang Philippine Health Insurance Corporation (PhilHealth) Capiz nga wala sang ‘ghost’ claims sang mga dialysis patients sa probinsiya.
Ini ang ginpahayag ni Local Health Insurance Officer Joe Frederick Diaz sang mainterview sang Bombo Radyo Roxas.
Suno kay Diaz, hugot ang ila nga monitoring indi lamang sa mga dialysis patients kundi mangin sa iban pa nga benepisyaryo sang ahensiya.
Ginpahayag sini nga mangin ang PhilHealth Regional Office 6 ang may kaugalingon man nga monitoring agud malikawan ang iregularidad sa ahensiya.
May ginalantawan sila suno kay Diaz nga portal kun sa diin mahibaluan kun maka-avail ang isa ka miyembro sang ahensiya sang nagakaigo nga bulig.
Mahibaluan nga nabutang sa kontrobersiya ang PhilHealth kasunod sang rebelasyon nga padayon nga pagkuha sang claims sa ahensiya sang WellMed Dialysis Center sa Quezon City apisar patay na ang pila sini ka mga pasyente.
