Ginpasiguro sang Philippine Army ang hugot nga pagbantay sa possible nga pagpamahog nga himuon sang mga rebelde nga komunista sa panahon sang eleksyon.
Ini ang sa pihak sang dalayon nga pagnubo sang numero sang mga rebelde kag pagkabungkag sa madamo nga front sang armado nga grupo.
Suno kay PH Army Spokesperson Col. Louie Dema-ala, magapabilin nga nakaalerto ang mga suldado agud mabantayan ang possible nga pag-impluwensya sang mga rebelde sa eleksyon, kalakip na ang pagpamahog sa mga komunidad kag ang anay na nga ginabantayan nga pagpangilkil sa mga kandidato.
Mahibaluan nga sang mga nakaligad nga eleksyon, ginabantayan sang PH Army ang ginahimo nga pagpangalap sang pondo sang mga rebelde gikan sa mga kandidato.
Sa pihak sini, ginpasiguro sang Army colonel nga wala na sang ikasarang pa nga manggamo ang mga rebelde sa nagahilapit nga eleksyon, ilabi na kag wala man nakabaton ang mga ini sang suporta gikan sa mga komunidad kag mga kandidato.
Base sa datos sang Philippine Army, nagaisahanon na lamang ang guerilla front nga nabilin kag padayon nga ginabantayan.
Samtang, ginpasiguro ni Col. Dema-ala ang kahandaan sang PA nga magbulig agud magbantay sa kabug-usan nga 2025 midterm elections.
Pahayag pa sini nga bastante ang numero sang mga suldado kag mga kagamitan sang grupo para i-deploy kag magbulig sa nagkalain-lain nga law enforcement agencies sa kabilugan sang May 2025 national kag local elections.
