Nagpahanumdom sang hugot nga paghalong sa mga beach goer subong nga Dominggo sang Pagkabanhaw.
Sa interview sang Bombo Radyo kay Lieutenant Commander Gemlan Lanusga, Commander sang Coast Guard Capiz, iya ginpahayag nga nakadeploy na ang tanan nga katapo sang ila talatapan humalin pa sang Palm Sunday agud siguruhon ang seguridad sa mga baybayon sang probinsya.
Suno kay Lanusga, nagpakig-angot naman sila sa mga beach resort nga masami nga ginakadtuan sang magpamilya agud nga maligo.
Pahayag pa niya, padayon man ang paglibot sang mga designated personnel sang kada sub-station sa mga coastal area agud masiguro man ang kahilwayan sang mga pilion nga sa baybayon na lang i-selebrar ang Dominggo sang Pagkabanhaw.
Dugang pa niya, kinahanglan nga may bantay ang mga kabataan nga nagapaligo sa tanan nga oras kag hugot man nga ginapanugyan ang paglikaw sa pagpaligo sa dagat ukon swimming pool kun yara sa impluwensya sang makahulubog nga ilimnon.
Nagpanawagan man ang natungdan sang kooperasyon sa publiko agud mapabilin ang kahilwayan kag malikawan ang ano man nga sahi sang insidente.
