Nagpakigbahin sang mga importante nga mga pahanumdom ang Philippine Red Cross Capiz Chapter para sa mga naga-plano nga magdonar sang dugo sa nagahilapit nga Dugong Bombo sang Bombo Radyo kag Star FM Station nga patigayunon sa Nobyembre 15, 2025.
Sa interview sang Bombo Radyo kanday Mr. Raymundo Martinez, Administrator sang Philippine Red Cross Capiz Chapter kag Mr. Kenny Bajande, Service Representative Disaster, ila ginpakigbahin ang mga dapat nga himuon sang isa ka donor antes nga magdonar sang dugo.
Una diri, kinahanglan nga magkaon –apang indi gid sang madamo; ika-duha, mag-inom sang madamo nga tubig, magtulog sang bastante –anom tubtob walo ka oras, magdala sang valid ID kag magsuksok sang komprtable nga bayo.
Dugang pa sang mga ini, ang mga pwede magdonar kinahanglan naga edad sang 18-anyos tubtob 60-anyos. Sa mga may luyag naman nga magdonar sang dugo nga naga-edad palang sang 16-17, kinahanglan nga may pahanugot sang ginikanan.
Ginadumilian naman nga magdonar sang dugo ang mga indibidwal nga naga-edad sang manubo sa 16-anyos, manubo sa 50 kilos ang bug-at, may yara sang highblood pressure, anemia ukon iban pa nga mga medical nga kondisyon, may yara sang hepatitis, tuberculosis, HIV/AIDS, kanser, pag-inom sang antibiotics ukon pila ka mga bulong sa nakaligad nga 7–14 ka adlaw, may tattoo ukon body piercing sa sulod sang tinalikdan nga 12 ka bulan, nag-inom sang makahulubog nga ilimnon ukon nagagamit sang droga, ka gang nagabusong ukon bag-o nagbata.
Samtang, ginpakigbahin man sang mga ini ang kinahanglan nga himuon pagkatapos sa pagdonar sang dugo sa diin amo ang mga masunod: magpahuway sang indi magnubo sa 10–15 ka minuto, likawan ang mga mabug-at nga aktibidad ukon magpanghangkwat sang mabug-at sa sulod sang 24 oras, mag-inom sang madamo nga tubig kag magkaon sang masustansya nga mga pagkaon kag obserbaran ang gin-injectionan para sa posible nga paglagob ukon paghubag.
Gin-athag man sini nga libre ang pagdonar sang dugo kag dako gid ini nga bulig indi para sa kaugalingon kundi para sa tanan nga nagakinahanglan.
Sa nagahilapit nga Dugong Bombo 2025, mga Ka-Bombo magpasakop na para sa isa ka makahulugan nga pagdonar sang Dugo. ‘A little pain, a life to gain’ sa diin agud maka-amot sa pagtipon sang dugo para sa mga nagakinahanglan sat ion sang mga emerhensya.
In an interview with Bombo Francis Biñas & Bombo Sunnie Mae Batencila
