Nag-apelar ang Philippine Institute of Volcanology and Seismology (Phivolcs) sa publiko nga seryosohon ang mga ginahiwat nga earthquake drill ukon simulation.
Ginhimo ni Phivolcs Director Teresito Bacolcol ang paandam sang Nationwide Simultaneous Earthquake Drill (NSED) nga ginhiwat sang tinalikdan nga adlaw nga kun sa diin, nangin scenario ang pagtay-og sang isa ka magnitude 7.2 nga linog.
Ang kabaskog sang nasambit nga linog ang ginabulubanta nga ginakahadlukan nga ‘the big one’ nga posible nga mag-igo sa pungsod, ilabi na sa National Capital Region.
Gintuad sang director, dapat mangin seryoso ang publiko sa pagsunod sa mga mekanismo, ginapaathag diri safety precaution, evacuation, kag survival strategies agud matun-aan kag himuon nila sa oras nga matabo ang nasambit nga trahedya.
Importante man suno diri nga panumdumon sang publiko ang mga ginaagyan kada ginahiwat ang drill agud malikawan ang pag-panic sa tion sang pagtay-og.
Dugang pa ni Dir. Bacolcol, may yara nga 175 nga aktibo nga fault sa pungsod.
Isa sa mga ginabantayan diri amo ang West Valley Fault nga posible nga maghulag sa sulod sang 400 tubtob 600 ka tuig, ukon posible nga matabo sa 2050’s.
Pila sa mga lugar nga ginaagyan sang West Valley Fault amo ang mga syudad sang Pasig, Quezon, Marikina, kag iban nga kalapit sini nga mga syudad sa Metro Manila.
Sandig sa nauna nga pag-rekord sang mga otoridad, posible nga tubtob 30,000 ka indibidwal ang potential kill kun matabo ang nasambit nga The Big One.
