ROXAS CITY – May panugyan ang Capiz Provincial Health Office may kaangtanan sa nagalapta nga sulfur dioxide sa area sang Luzon kag Visayas nga nagikan sa Bulkan Kanlaon.
Sa interview sang Bombo Radyo kay Provincial Health Officer II Dr. Ramon Alex Nolasco, ginapanugyanan sini ang mga pumuluyo nga kun mahimo limitahan ang pagtinir sa guwa agud malikawan ang paghaklo sang sulfur dioxide ilabi na kun mataas ang level sini sa palibot.
Dugang pa sini nga kun magguwa sa panimalay magsuksok sang facemask kaangay sang N95 ukon regular mask agud maprotektahan ang kaugalingon batuk sa sulfur dioxide nga makahalalit ilabi na sa respiratory system.
Suno kay Dr. Nolasco, ang sulfur dioxide ang isa ka sahi sang gas nga indi makit-an gani kinahanglan gid ang pagsuksok sang facemask ukon proteksyon sa mata kasubong sang eyeglass bangud makatuga man ini sang eye irritation.
Pahayag pa sini nga dapat bantayan ang mga kabataan kag katigulangan bangud sila ang vulnerable ukon dali makabatyag sa epekto sang nasambit nga gas.
Suno pa kay Nolasco nga kun may nabatyagan ang isa ka indibidwal gilayon nga magpakonsulta sa pinakamalapit nga health facility.
Matandaan nga sadtong tinalikdan nga adlaw naglapta ang impormasyon sa social media base sa forecast sang Copernicus Atmosphere Monitoring Service (CAMS) nga ginapahayag naglapta sa Luzon kag Visayas ang πππΉπ³ππΏ π±πΆπΌπ πΆπ±π² nagikan sa bulkan Kanlaon.
Sa karon suno kay Nolasco wala pa sila sang may nabaton kun pila ang level ukon category sang sulfur dioxide nga nagalapta nagikan sa nasambit nga bulkan.
