ROXAS CITY – Ginsulod sang wala pa matumod nga mga kawatan ang isa ka computer and photocopying services sa Legazpi St. Brgy. IV, Roxas City.
Ginkilala ang tag-iya sang amo nga shop nga si alyas Kim, 47-anyos nga residente sang Sitio Paon, Brgy. IV sini nga syudad.
Sa impormasyon nga nakuha sang Bombo Radyo nagikan sa Roxas City Police Station, takna alas 7:30 kaina sang aga, natukiban nalang sang tag-iya sang ginbuksan sini ang shop nga wala na ang iya Cannon Camera nga ginabulubanta nagabalor sang P49,000.00, Laminator nga ginabulubanta nagabalor sang P8,000.00, Epson L1415 printer nga ginabulubanta nagabalor sang P29,000.00, cash nga P4,000.00, nanari-sari nga sales item nga nagabalor P5,000.00, kag nanari-saei nga computer supplies nga nagabalor P10,000.00.
Samtang sa pagpangusisa sang Bombo Radyo News Team sa lugar, lakip man sa ginkawatan ang tupad sini nga milk tea shop nga ginaalegar amo ang gin-agyan sang mga kawatan kun sa diin nakuha man ang Blender nga nagabalor P3,000.00, Steam machine nga nagabalor P6,000.00, 42 Cups, 24pcs nga Siopao, kag 54pcs nga Siomai.
Sa karon naga-request na ang mga kapulisan sang CCTV footage sa mga kalapit nga establisyemento agud matumod ang mga suspek.
