ROXAS CITY – Ginlamon sang kalayo ang pila ka mga hulot sang Tanza Elementary School sa Barangay Tanza, Roxas City.
Mahibaluan nga totally-burned classroom sang kindergarten kag library, samtang partially-burned naman ang isa ka hulot nga nagaserbi nga kalan-an sang mga estudyante, feeding room kag ang principal’s office sang amo nga eskwelahan.
Gilayon naman nga napalong ang kalayo kasunod sang madasig nga pagresponde sang mga miyembro sang Bureau of Fire Protection – Roxas City Fire Station.
Nagaguha naman sa imbestigasyon sang mga otoridad nga ginhungod ang pagsunog sa nasambit nga eskwelahan matapos marekober ang pila ka mga ginkumos nga karton kag lighter nga posible gingamit sa pagpangsunog sa nasambit nga mga hulot.
Daku naman ang pagpati sang principal nga si Emily Joy Gutierrez nga ‘intentional’ ukon ginhungod ang pagpangsunog sa pila ka mga hulot sa amo nga eskwelahan.
Suno kay Gutierrez nga nakibot ini sang gintundaan sang iya kaupdanan nga mga manunudlo nga may nagaluntad nga sunog sa nasambit nga eskwelahan
Ginpahayag ni Gutierrez nga kalakip sa nagkalasunog amo ang projector, importante nga mga dokumento, refrigerator, gas stove, mga libro nga ginagamit sang mga kabataan kag iban pa.
Gindugang pa ni Gutierrez nga may yara na sila sang ginadudahan nga suspek sa pagpangsunog nga ginaalegar may problema sa paminsaron.
Sa karon padayon pa nga gina-imbestigahan sang mga otoridad ang nasambit nga insidente.
