ROXAS CITY – Nagalab-ot pa sa masobra 600 nga pending results sang real-time polymerase chain reaction (RT-PCR) tests sang mga nagpalauli nga locally-stranded individuals (LSI’s) kag repatriated Overseas Filipino Workers (OFW’s) ang ginahulat karon sang Capiz Provincial Health Office.
Ini ang ginkompirmar mismo ni Capiz PHO Spokesperson Ayr Altavas sang mainterview sang Bombo Radyo.
Suno kay Altavas, mahinay ang pag-abot sang resulta sang amo nga tests bangud sa Western Visayas, duha gid lamang ang authorized molecular laboratory nga ginalakipan sang Western Visayas Medical Center sa Manduriao, Iloilo kag Teresita L. Jalandoni Provincial Hospital sa Silay City, Negros Occidental.
Aminado man ang opisyal natuhoy sa mga nagareklamo nga LSI’s kag OFW repatriates nga naglapaw na sa 14-day quarantine period apang wala gihapon nagaabot ang ila nga test results.
Apang ginklaro sini nga mahimo naman sila nga mapapauli sang mga local government units (LGU’s) ilabi na kun wala man sila sang anuman nga sintomas apang kinahanglan sa gihapon masunod ang nagakaigo nga mga guidelines.
Ginmanduan man suno diri ang mga LGU’s nga magpahamtang sang Temporary Treatment and Monitoring Facilities (TTMF) nga temporaryo nga teniran sang mga LSI’s kag OFW repatriates samtang ginahulat ang ila nga laboratory results.
