ROXAS CITY – Pila ka menor de edad ang ginapatihan nagpositibo man sa rabies matapos nga makakaon sang ginkatay nga ido sa Barangay Aranguel, President Roxas Capiz.
Mahibaluan nga lima ka tuig ang edad sang pinakabata sa 24 ka mga indibidwal nga ginapatihan nagpositibo sa rabies.
Bangud diri gilayon ginpabakunahan sang Municipal Health Office sang nasambit nga banwa ang 24 ka mga indibidwal nga nakakaon sang katay nga ido.
Ginpahayag ni Punong Barangay Richard Baltar nga gintugyan sini sa lokal nga gobyerno sang banwa ang pagbakal sang anti-rabies vaccine nga gilayon gin-inject sa mga nakakaon sang rabid dog.
Mahibaluan nga na-inject na ang 2nd dose sang nasambit nga bakuna kag natalana naman sa adlaw sang Biyernes ang pag-inject sang 3rd kag last dose.
Padayon man ang pag-monitor sa nasambit nga mga indibidwal kun makitaan ang mga ini sang sintomas sang rabies kasubong sang hilanat, wala sang gana sa pagkaon, pagpalanakit sang lawas kag nahadlok sa tubig.
Kasunod man sang insidente magapatigayon sang symposium sa nasambit nga barangay may kaangtanan sa balatian nga rabies.
