ROXAS CITY – Pila ka mga kabaranggayan sa banwa sang Sigma, Capiz ang lubog sa tubig baha kasunod sang pagbubo sang mabaskog nga ulan epekto sang Bagyong Quinta.
Ini ang ginkumpirmar ni Municipal Disaster Risk Reduction and Management Office (MDRRMO) Officer Jonard Manpuesto sang mainterview sang Bombo Radyo.
Kalakip sa mga barangay sa amo nga banwa nga lubog sa tubig baha kag indi pa mahimo nga maagyan sang mga magagmay nga mga salakyan amo ang Sitio Balud, Barangay Cogon; Sitio Kaargawan, Barangay Dayhagon; Sitio Sugod, Barangay Poblacion Norte; Sition Manaba, Barangay Bangon-Bangon kag Sitio Bang-bang, Barangay Acbo.
Magluwas diri, naapektuhan man ang pila ka mga pananom ukon palayan sa mga barangays nga ginalakipan sang Barangay Acbo, Amaga, Balucuan, Bangonbangon, Capuyhan, Cogon, Dayhagon, Guintas, Malapad Cogon, Mangoso, Matangcong, Matinabus, Mianay, Oyong, Pagbunitan, Parian, Pinamalatican, Poblacion Norte, Poblacion Sur kag Tawog.
Wala naman sang napagkit nga evacuees bangud sa mga pagbaha.
Ginpahayag naman ni Manpuesto nga padayon ang ginapatigayon nga monitoring sang MDRRMO sa mga lugar kun sa diin madasig nga nagataas ang lebel sang tubig.
Samtang, ginahulat pa karon sang MDRRMO ang data nagikan sa Department of Agriculture kun pila tanan ang kabug-usang nga kahalitan sa sekto sang Agrikultura bangud sa nasambit nga baha.
