ROXAS CITY – Mahina kag malaka lamang ang mga pasahero nga naga-abot kag nagasakay sa mga pampasahero nga salakyan kag ceres sa Roxas City Integrated Transport Terminal sa Pueblo Terminal, Roxas City kadungan sang Paskwa.
Sa interview sang Bombo Radyo sa konduktor sang ceres via Roxas City-Iloilo vice versa nga si Wilson, ginpahayag sini nga sumugod sadtong Disyembre 24 nangin malaka na lamang kag indi na mapuno ang isa ka unit antes maghalin sa terminal.
Mahibaluan nga yara sa P209.00 ang regular nga pletehan para sa mga air conditioned nga ceres kag P207.00 naman ang discounted.
Sa separado naman nga pagpakig-angut sang Bombo Radyo Patrol sa driver sang jeep via Maayon-Roxas City vice versa nga si
Rolly Quiachion ginpahayag sini nga nagdamo lamang ang ila pasahero sadtong Disyembre 23 apang matapos sini kaangay nagbalik sa normal ang lakat sang ila byahe kung sa diin haluson nga indi makabawi sa ila pagbakal sang krudo.
Bangud sini nga sa 15 ka unit nga mga salakyan ang nagabyahe, 5 lamang sila ang nagapasimpalad nga magbyahe subong nga tion sang Paskwa.
