ROXAS CITY, CAPIZ – Nakakumpiskar ang Roxas Component City Police Station sang pila ka mga iligal nga palupok kadungan sang holiday season.
Sa interview sang Bombo Radyo kay Roxas City PNP Chief PLTCOL Lumyaen Lidawan, pila sa mga nakumpiskar nga iligal nga palupok amu ang lima (5) ka box sang Poppop, 80 ka oversized nga kwitiz, 60 ka Judas Belt kag iban pa ka sahi sang mga oversized nga palupok.
Samtang, naglab-ot naman sa pito (7) ka mga boga ang na-confiscate sang Roxas City PNP sa mga kabaranggayan sa syudad sang Roxas kag maswerte naman nga wala sang may nabalhag nga nalukpan nga mga kabataan sa paggamit sang boga.
Pahayag pa sini nga ang amu nga mga palupok ang gin-turn over na sa FESAGS Section sang kapulisan para sa nagakaigo nga disposisyon. Dugang pa sini nga nagpatigayon man sang inspekyon Roxas City PNP kaupod ang Regional Civil Security Unit 6 sa mga nagabaligya sang palupok sa Pueblo de Panay Public Market.
Nagpanugyan man ini sa pila ka mga nagabaligya sang firecrackers nga kun mahimo indi sila magbaligya sang mga ginadumilian nga mga palupok ilabi na sa mga menor de edad. Mensahe sini sa publiko nga kun mahimo nga maggamit na lamang sang torotot ang mga kabataan kag mga sounds agud nga malikawan ang pila ka mga insidente sa pagsug-alaw sang Bag-ong Tuig.
