ROXAS CITY -Pabor ang pila ka iloy nga mga vendors sa Burgos Talipapa, Burgos Street, Roxas City sa liwat nga pagbalik sang Good Manners and Right Conduct (GMRC) nga subject sa idalum sang pagtulun-an sang K-12 curriculum.
Ginpahayag ni Judy Suelo, isa ka vendor kag may yara sang apat ka mga kabataan, nga pabor ini sa pagbalik sang GMRC sa pagtulun-an sang mga estudyante bangud nagapati ini nga dako ang partisipasyon sang mga nanunudlo sa pagtudlo sang maayo nga pamatasan sa mga estudyante sa pihak sang pagiya sang mga ginikanan.
Gindugang pa ni Suelo nga mas madamo ang oras nga ginatinir sang mga kabataan sa buluthuan kun ikomparar sa ila tagsa ka mga panimalay.
Pabor man si Mary Rose Decara sa pagbalik sang subject nga GMRC sa pagtulun-an sa mga buluthuan bangod naobserbahan sini, nga madamo na nga mga kabataan ang wala sang respeto sa ila nga mga ginikanan.
Nagalaum si Decara nga sa liwat nga pagtudlo sang GMRC sa mga
buluthuan, liwat man nga maga-ayo ang pamatasan sang mga kabataan.
Samtang dako man ang kalipay ni Haydee Casumpang sa plano nga liwat nga pagtudlo sang subject nga GMRC sa mga buluthuan bangod dako ang mabulig sini sa pagtadlong sang mga malain nga pamatasan sang mga kabataan.
Ginpahayag ni Casumpang nga personal sini nga na-eksperyensyahan ang indi maayo nga pamatasan sang isa ka estudyante.
Suno kay Casumpang nga nasalapay sang isa ka estudyante ang mga baligya sini apang tuman ang kadismaya sang ginang bangod wala gid nagbalikid ang estudyante agud magpangayo sang pasaylo.
Mahibaluan nga ginpirmahan na ni Presidente Rodrigo Duterte ang R.A. 11476 ukon GMRC and Values Act nga ginabalik ang Good Manners and Right Conduct (GMRC) sa pagtulun-an sa idalum sang K-12 curriculum.
