ROXAS CITY – Ginkumpirmar ni Hugpong Transport-Capiz coordinator Mr. Jobert Carandang nga magapatigayon sang “untat-biyahe” ang pila ka mga drivers sang Public Utility Jeepneys sa probinsya.
Sa interview sang Bombo Radyo kay Carandang, ginsiling sini nga nagapahayag na ang pila ka mga drivers nga magapahuway sila sa pagbiyahe sa masunod nga semana, bangud indi na nila masarangan ang epekto sang asud-asod nga pagtaas sa presyo sang produktong petrolyo.
Makabulig kag makapahagan-hagan man suno diri ang natalana nga pag-release sang pauna nga P6,500 nga fuel subsidy subong nga Marso 15 kag dugang nga P6,500 sa masunod nga bulan sang Abril, apang ang pamangkot sang mga drivers kun tubtob san-o ang amu nga bulig sang gobyerno.
Panawagan sang nasambit nga organisasyon, nga isuspende ang excise tax kag amyendahan ang deregulation law agud makabenepisyo ang kadam-an indi lamang ang sektor sang transportasyon.
Samtang, ginkumpirmar man ni Carandang nga nagsumiter na ini sang listahan sang mga lehitimo nga PUJ drivers sa gobyerno probinsyal para sa plano sang gobernador nga paghatag sang subsidiya kag nagalaum nga maaprubahan sang Sangguniang Panlalawigan ang nasambit nga request.
