ROXAS CITY – Nagpatigayon sang hublag- protesta ang pila ka mga pumuluyo sa pungsod Sri Lanka bangud indi sila pabor sa panibag-o nga presidente nga si Ranil Wickremesinghe.
Sa interview sang Bombo Radyo kay Mrs. Jovy Genite, Bombo International Correspondent sa Sri Lanka, ginsiling sini nga kahapon nga adlaw nagpatigayon sang parliamentary election kun sa diin ang miyembro sang parlyamento sang Sri Lanka ang nagboto sa mangin panibag-o nga presidente.
Suno diri, sa kabug-usan nga 225 ka mga miyembro, 2 diri ang wala nagboto, samtang 223 ang nagpartisipar kun sa diin nakuha ni Wickremesinghe ang 134 nga boto rason sang iya kadalag-an.
Dugang ni Genite, nangin dako nga palamangkutanon sang mga pumuluyo ang nangin resulta bangud damo man sang isyu ang nasambit nga panibag-o nga presidente kapareho sang ikaanom na siya nangin prime minister apang wala bisan isa nga natapos nga termino kag gina alegar isa man sa rason sang bankruptcy sang Sri Lanka bangud kaalyado man siya sang mga Rajapaksa.
Ginapatihan nga nainganyo ang kadam-an sa parlyamento sa mga proposal ukon propaganda nga ginpresentar ni Wickremesinghe rason nga siya man ang nagdaog.
Ginsiling ni Genite, ginabantayan na lamang sang mga tawo ang mangin performance ukon mga himuon sang presidente kag nagalaum ang mga ini nga makabulig siya sang tampad sa ila pungsod.
