ROXAS CITY – Pabor ang pila ka mga vendors nga kakason na ang mandatoryo nga pagsuksok sang facemask sa bukas nga lugar.
Sa pagpakig-angut sang Bombo Radyo kay Haide Casumpang, tindera sa may Burgos Talipapa, ginpahayag sini nga dako ang mabulig sa ila nga mga manugbaligya kun kakason na ang facemask.
Suno diri, maluwas sa mainit na, mabudlay pa magginhawa kun nagasuksok sang facemask, rason nga ginapili na lang nila nga indi magsuksok ukon ipapanaug ang facemask sa idalum sang baba agud makaginhawa man sang preska nga hangin bisan makadali.
Pahayag ni Casumpang, nahibaluan man sini ang nagakahinabo sa palibot ilabi na nga may yara pa sang pagpamahog sang subvariants sang virus.
Nagapanawagan ini sa mga natungdan nga ahensya nga halugaan na ang pagsulundan ilabi na ang pag-usar sang facemasks sa mga bukas nga lugar kag himuon nga boluntaryo bangud sa padayon nga pagnubo sang kaso sang COVID-19 sa probinsya sang Capiz.
