ROXAS CITY – Aminado ang pila ka mga vendors sa Teodoro Arcenas Trade Center (TATC) partikular sa may bahin sang isdaan, nga nagakahinabo ang pagdinayaay sa amu nga merkado.
Sa interview sang Bombo Radyo kay Chris Bendoy kag Romeo Union, lunsay mga vendors sa fish section, ginpahayag sang mga ini nga indi na bag-o ang surprise random checking nga ginpatigayon sang TATC Management, sa mga kilohan sa merkado, bangud gulpi lang nagaabot ang mga ini agud tsekyaron ang ila kilohan.
Indi man suno diri nga tanan nga kilohan sa TATC ang mga madaya, bangud nagapati ang mga ini nga sa tawo ang pagdinaya kag indi sa kilohan.
Ginbuyagyag man sang mga ini ang ginahimo nga teknik sang pila ka mga madaya kun sa diin, ang iban ginapaguwa nga sobra sang isa ukon duha ka guhit ang ginpamakal sang bumalakal, apang sa pagkamatuod nga kulang ini sa bug-at.
Masami man suno diri nga sa bultohan ukon wholesale ang pagdinaya sa kilohan bangud indi ini madali mahalata sang bumalakal.
Wala man madala sa ginkumpiskar nga kilohan ang iya nanday Bendoy kag Union, bangud wala sila nagapangdaya sang isigkatawo.
Matandaan nga may walo ka mga kilohan ang ginkumpiskar sang tagdumalahan sang TATC bangud napamatud-an nga ila ini ginamanehar.
Sa tion nga makalapas sang tatlo ka beses nga pagpangdaya ang isa ka vendor, may posibilidad nga mapahalin ini sa amu nga puwesto sa merkado.
