PILAR, CAPIZ- Ginpatpat sang Officer-In-Charge sang Pilar Municipal Police Station ang mga accomplishments sang ila nga talatapan sa banwa sang Pilar, Capiz halin Enero tubtob Agosto 2025.
Sa interview sang Bombo Radyo kay Police Major Rachelle Garnica, Officer-In-Charge sang Pilar Municipal Police Station, iya ginpakigbahin ang mga accomplishments sang ila nga talatapan sa diin nga nagresulta sa pagpabilin sang palibot nga malinong kag matawhay.
Sa mga nanari-sari nga mga aktibidad nga ginpatigayon sang ila nga team, nakadakop sila sang walo (8) tanan ka mga wanted persons nga ginkalakipan sang tatlo (3) ka mga most wanted sa Regional kag Municipal Level kag lima (5) ka mga other wanted persons. Naka-rekober man ini sila sang 12 tanan ka mga armas-luthang sa ila sini kampanya nga Tokhang Kontra Armas-Luthang (TKAL). May yara man sang 10 ka mga boluntaryo nga gin-surrender kag tatlo (3) nga nakumpiskar pamaagi sa Search Warrant Implementation.
Dugang diri, nakadakop man sila sang syam (9) ka mga indibidwal nga naangut sa iligal nga droga, sa diin isa diri ang pamaagi sa pag-implementar sang Search Warrant kag ang walo ang pamaagi sa buybust operations. Nakadakop man sila sang 14 tanan ka mga indibidwal nga nagpatigayon sang iligal nga pagpangisda sa diin kalakip diri nga nakumpiskar ang mga kagamitan nga nagabalor sang mas ukon menos P2.5M.
Pag-abot sa sitwasyon sang seguridad sang banwa sang Pilar, yara sa maayos kag ordered nga kahimtangan sa diin nga ginakabig ini bilang isa sa matawhay nga banwa sang probinsya sang Capiz.
Bangud sa bulig kag suporta sang lokal nga gobyerno, mga barangay officials kag mga pumuluyo sang banwa, nagapabilin ang kalinong kag katawhay sa palibot.
Samtang, nagapadayon sa gihapon ang mga nagkalain-lain nga mga programa sang talatapan kaangay sang pagpanagtag sang mga informative pamphlets sa mga pumuluyo, pag-conduct sang symposium, kag baranggay visitation. Isa pagid ka programa ang sa karon nga ila ginapabaskog amo ang programa nga inisyatibo sang bag-o nga Chief sang Philippine National Police nga si Police General Nicolas Torre III nga 911 National Emergency Call sa diin amo ang pagpangayo sa ila sang bulig pamaagi sa pagpanawag gamit ang telepono ukon cellphone kag sa sulod sang lima ka minuto ila pagarespondehan.
Pahayag pa ni Garnica, pamaagi sa pagbinuligay sang mga otoridad, lokal nga gobyerno kag mga pumuluyo naagaresulta sa paging madinalag-on ang mga programa sang kapulisan.
Lauman naman suno sa iya nga magapadayon ang tanan nga mga aktibidad sang mga katapo sang Pilar Municipal Police Station agud mapabilin ang kalinong kag katawhay sa palibot sang banwa.
In an interview with Bombo Francis Biñas & Bombo Sunnie Mae Batencila
