Pinay Olympic gold weightlifter Hidilyn Diaz-Naranjo, magatudlo sa UP sa masunod nga tuig

Gin-anunsyo ni Pinay Olympic gold weightlifter Hidilyn Diaz-Naranjo nga magatudlo siya sa UP sa masunod nga tuig.

Sa iya social media account, ginpahayag sini nga mangin kabahin siya sang faculty sang University of the Philippines College of Human Kinetics (UP CHK) sa masunod nga tuig.

Nakigsapol na ini sa mga katapo sang College Executive Board sang UP-CHK bilang kabahin sang iya preparasyon.

Matandaan nga sang Hulyo, gin-hire siya bilang guest speaker sa graduation sang UP CHK kun sa diin iya ginpabutyag ang iya handom nga magtudlo.

Dugang pa niya, nga ini ang iya pamaagi agud mabalik sa mga estudyante ang iya natun-an.

Sa subong, nagatudlo man siya sa mga pamatan-on sa iya HD Weightlifting Academy.