ROXAS CITY – Ginklaro ni PLT. Col. Francisco Paguia Jr. hepe sang Roxas City PNP nga indi sang planted ang ila ginkasa nga drug buybust operation sa isa tricycle driver nga nadakpan sa Barangay Tanque sining syudad kahapon sang aga takna 10:51 Nobyembre 16, 2023.
Matandaan nga ginkilala ang nadakpan kay alyas “Mokong” 55-anyos kag residente sang nasambit nga lugar.
Sa interview sang Bombo Radyo kay Paguia, ginsiling sini nga madugay na nila ini nga ginatiktikan apang mabudlay suno diri sa mga operatiba nga makabal sa suspek bangud ang modus lamang sini nagakatabo sa sulod mismo sang iya puluy-an.
Apang nangin madinalag-on ini nga nadakpan pinaagi sa pagbakal sang isa ka pulis sang isa ka sachet sang ginapatihan iligal nga droga nga nagabalor P40, 000.00 nga nagpakuno-kuno poseur buyer.
Natigayon nga madakpan si alyas “Mokong” pinaagi sa gintingub nga pwersa sang Philippine Drug Enforcement Agency (PDEA) Regional 6 kag Roxas City PNP.
Dugang nga nakuha sa posesyon sini ang P500.00 nga buybust money, P39,500 counterfeited money, dugang nga tatlo ka sachet sang ginapatihan iligal nga droga nga may Standard Drug Price P170,000.00 kag may kabug-aton nga 25gramos kag coin purse nga nagaduag asul.
Sa karun ang mga illegal drugs yara sa kustodiya sang Roxas City Laboratory para sa examination samtang ang mga non-drug items naman nagapabilin sa kustodiya sang City Health Office Roxas City para sa medical examination.
Kaso nga paglapas sa Republic Act 9165 ukon Comprehensive Dangerous Drugs Act of 2002, ang paga-atubangon sang nadakpan.
Panugyan ni Paguia sa mga nagapadayon sa subong sini nga buluhaton, untatan na bangud wala ini sang maayo nga epekto sa lawas sang isa ka indibidwal.
