Gin-anunsyo sang Philippine National Police (PNP) nga nakahanda na ang ila nationwide security and public safety plan agud masiguro ang malinong kag luwas nga selebrasyon subong nga tigkalalag 2025.
Suno kay PNP Acting Chief Police Lieutenant General Jose Melencio Nartatez Jr. nga nagpahamtang na sila sang mga kapulisan sa nagkalain-lain nga bahin sang pungsod, partikular sa mga transport terminal, sementeryo, kag pampubliko nga lugar, bilang preparasyon sa pagdagsa sang mga biyahero kag bisita sa ila nagtaliwan nga mga pinalangga.
Sa idalum sang Oplan Ligtas Undas 2025, ginabulubanta nga nagalab-ot sa 62,868 ka mga tinawo gikan sa PNP, Armed Forces of the Philippines, Bureau of Fire Protection, kag Philippine Coast Guard ang na-assign sa bug-os nga pungsod.
Ginpahanumdom man sini ang kapulisan nga magpabilin nga alerto kag madali palapitan, kadungan sang pag-engganyo sa publiko nga gilayon nga i-report sa mga otoridad ang anuman nga makaduluda nga pamatasan ukon sitwasyon.
Dugang pa ni Nartatez, dapat siguraduhon sang mga pamilya ang seguridad sang ila puluy-an antes maghalin, tsekyaron ang mga kandado, kag likawan ang pagbilin sang mga malahalon nga butang sa ila nga puluy-an.
Matandaan nga gin-anunsyo sang PNP nga yara sila sa heightened alert status para sa tigkalalag 2025, sa diin gindugangan sang 25% ang assigned personnel agud masiguro ang luwas kag matawhay nga pagdumdom sang tigkakalag subong nga tuig.
