Naka-heightened alert na ang Philippine National Police (PNP) sa posible hublag-protesta may kaangtanan sa International Criminal Court (ICC) hearing batuk kay Former President Rodrigo Duterte subong nga adlaw.
Suno kay PNP Chief Jose Melencio Nartatez Jr., ginpahamtang na sa heightened readiness ang tanan nga police units kag sa subong ginamonitor ang posible nga dalagku nga pagtililipon agud masiguro ang kaluwasan sang publiko.
Dugang pa niya, bisan ano man nga partido ukon grupo, nagabantay ang kapulisan agud maamligan ang ila kinamatarung kag mapabilin ang kalinong kag katawhay.
Kaangot sini, ginmandu man sang hepe sang PNP ang mga regional units nga magdeploy sang Civil Disturbance Management (CDM) teams kag siguraduhon nga naka-standby ang mga medical emergency responders sa tion nga may yara sang dalagku nga pagtililipon.
Apisar ginhatagan pagtamod sini ang pagtahod sa kinamatarung sang mga pumuluyo sa pagpabutyag sang ila opinyon, ginpahayag ni Nartatez nga prayoridad sa gihapon sang PNP ang kaluwasan sang publiko.
Pahayag niya, ipatuman man ang maximum tolerance, apang ginmanduan ang tanan nga pulis nga magpabilin nga propesyonal kag likawan ang anuman nga komprontasyon kag magsunod sa kasuguan.
Samtang nagpanawagan naman ang PNP Chief sa mga kritiko kag supporters ni Duterte nga magpabilin nga kalmado kag indi pagtugutan nga magpangibabaw ang emosyon nga mahimo magresulta sa kalakasan ukon paglapas sa kasuguan.
Nahibaluan nga subong nga adlaw magasugod ang pre-trial confirmation of charges hearing ni Former President Rodrigo Duterte kag magatakop sa February 27.
