ROXAS CITY – Gilayon nga ginpabakunahan sang Municipal Disaster Risk Reduction and Management Office (MDRRMO) sa banwa sang Cuartero, Capiz ang 12 ka mga indibidwal nga nagsumsuman sang ido sa Sitio Capul-an, Barangay Agdahon, Cuartero, Capiz.
Ginpahayag ni MDRRM Officer Ronald Guillermo, ginpakamaayo sang ahensiya nga pabakunahan ang nasambit nga mga biktima matapos napatay ang isa ka lalaki nga ginkagat sang ido nga ila ginsumsuman.
Nahibaluan nga matapos nakagat sang ido si Roberto Caballero, masami na ini nga nagabulad sa initan bangud suno sa iya, nalamigan siya kag nagalain ang iya nga pamatyag kun siya ang mahanginan.
Bangud diri, gindala sa ospital ang biktima sadtong Setyembre 24, subong nga tuig, kag gilayon nga ginbawian sang kabuhi pagkaaga.
Gilayon man nga ginlubong ang biktima agud indi na makatuga pa sang peligro sa mga residente sa nasambit nga lugar.
Magluwas pa diri, dugang nga 12 ka mga indibidwal ang ginpabakunahan bangud ginapatihan nga na-expose kay Caballero antes pa man ini napatay.
