ROXAS CITY – Ginsabat ni Dao Mayor Jose Jimbo “Nonong” Barruela ang rason sa pag-utang sang ila banwa sang kapin P200 milyon sa bangko.
Sa interview sang Bombo Radyo kay Barruela, ginsiling sini nga sang nagapangampanya pa lamang ini sa pagka-alkalde, natalupangdan sini kag kadam-an nga ginpalab-ot man sang ila pumuluyo amu ang problema sa guba nga karsada.
Gani sang nagmadinalag-on ini sa eleksyon kag nag-offer sang loan ang Development Bank of the Philippines (DBP), diri kag nadasesisyunan sini nga mag-utang, bangud kun saligan lang ang pondo sang ila banwa, indi ini masarangan nga proyekto.
Importante suno diri ang amu nga loan agud matigayon ang construction sang farm to market road sa ila lugar.
Ginkakibot lang sini ang balita nga gindeklarar sang Sangguniang Panlalawigan nga invalid ang ginpapasar nga resolusyon sang ila Konseho para sa amu nga loan.
Ginkatingala lang sang alkalde bangud indi ini ang una nga kahigayunan sang ila LGU nga mag-utang, bangud gin-aprubahan man sang nagligad nga administrasyon ang gin-apply nga loan sang ila LGU.
Pagpunto ni Barruela nga indi man ini pagtan-ayan sang loan sang bangko kun wala sila sang kapasidad nga makabayad, sa pagkamatuod may certificate ang LGU Dao nagikan sa Bureau of Local Government Finance kag P247 milyon ang offer sang DBP, apang P200 milyon lang ang ila paga-utangon.
Pahayag sang alkalde nga preparado ang ila LGU sa mga dokumento nga kinahanglan sang Sanggunian.
