ROXAS CITY – Wala na naabtan pa sang mga nagresponde nga barangay officials ang grupo sang mga pamatan-on nga nagapatigayon sang illegal drag racing ukon palumbaanay sang motorsiklo sa Sitio Tambak, Barangay Culasi, Roxas City.
Suno sa barangay secretary nga si May, nakabaton sila sang impormasyon natuhoy sa ilegal nga aktibidad sa amo nga lugar rason nga ila ini nga ginpadulungan.
Apang pag-abot sang mga opisyales sang amo nga barangay kaupod ang mga barangay tanod, wala na ang mga pamatan-on kag ginapahayag nga madasig nga nagpalagyo.
Suno sa opisyal madugay na nila nga problema sa barangay ang ilegal nga aktibidad apang indi matapna bangud sa tagsa ka magresponde ang mga pulis, wala naman sila sang maabtan.
Ginkompirma man sang opisyal nga base sa mga ginapalab-ot nga impormasyon sa ila, may nagakahinabo nga tay-anay sa nasambit nga ilegal nga aktibidad.
Gindugang pa ni Melqiades Ariz, chief tanod sang amo nga barangay, madugay na nila nga ginpalab-ot sa mga kapulisan ang nasambit nga problema apang wala gihapon ini matapna.
Suno diri nga masami nagabalik sa gab-i ang mga nagapalagyo nga persona para liwat magpatigayon sang ilegal nga aktibidad.
Ginkompirmar pa sini nga magluwas sa motorsiklo, may palumbaanay man sang iban pa nga salakyan sa lugar.
