Nagdeklara si President Ferdinand Marcos Jr. sang state of calamity sa sulod sang isa ka tuig pinaagi sa pag-issue sini sang Proclamation No. 920 agud hatagan sang ligwa ang pagkaayo sang San Juanico Bridge.
Suno kay President Marcos, epektibo ang state of calamity sang Hunyo 5 kag mahimo nga i-lift sang mas timprano ukon i-extend pa depende sa sirkumstansya.
Isa sa mga pinakamalaba nga taytay sa Pilipinas amo ang 2.16-kilometer nga San Juanico Bridge sa diin nagakonekta ini sa Samar kag Leyte.
“The declaration of a State of Calamity will, among others, hasten the repair and rehabilitation of the San Juanico Bridge, and afford the National Government, as well as local government units (LGUs), ample latitude to utilize appropriate funds for the repair and safety upgrading of the subject public infrastructure,” nasaad sa proklamasyon.
Ginmanduan sang Presidente ang Department of Public Works and Highways nga may koordinasyon sa Local Government Units nga himuon ang tanan nga tikang sa pagkaayo sang San Juanico Bridge.
Ginmanduan man ni Marcos ang Department of Budget and Management (DBM) nga i-assist ang DPWH sa pag-identify sang mahimo kuhaan sang pondo para sa rehabilitation sang taytay.
