Gindeklarar ni President Ferdinand “Bongbong” Marcos Jr. ang pagtukod kag pagtalana sang duta sa Barangay Baculong sa Victoria, Tarlac bilang special economic zone.
Santo sa Proclamation No. 623 nga pirmado ni Executive Secretary Lucas Bersamin sang Hulyo 4, ang 297,719 square meter nga propedad ang kilalahon nga Victoria Industrial Park.
Ang special economic zones amo ang mga pili nga lugar nga highly developed ukon may potensyal nga madevelop bilang agro-industrial, industrial, tourist/recreational, commercial, banking, investment kag financial centers.
Ang nasambitan nga zones ang sarang mahamtangan sang mga industrial estates, export processing zones, free trade zones kasubong man tourist ukon recreational centers.
Ang mga lugar ang sarang ma-establish nga ecozones paagi sa proclamation nga gin-issue sang Presidente kag subject sa evalution kag rekomendasyon sang Philippine Economic Zone Authority (PEZA) pinaagi sa detalyado nga feasibility kag engineering study.
Sadtong Mayo, una nga ginpahayag ni Presidente Marcos nga handa na ang Philippine economic zones nga magbatun sang mga negosyo, kag ang designated development sites ang bukas para sa tanan nga foreign investors.
Naka-aprubar naman ang PEZA sang balor P2.21 billion nga bag-o kag expansion projects sa una nga bulan sang 2024.
Suno sa ahensya, ang 12 ka mga proyekto nga ginhatagan nila sang pahanugot ang makaganar sang 69.62 million dollars nga balor sang exports kag 1,337 nga trabaho.
Ang 12 ka proyekto ang ginalakipan sang pito ka ecozone export enterprises, apat ka information technology enterprises, kag isa ka facilities enterprise.
