Ginpirmahan na ni President Ferdinand Marcos Jr. ang Republic Act No. 12316 nga may katuyuan nga suspendihon ang excise tax sa gatong sa pungsod agud mapahagan-hagan ang epekto sang mataas nga presyo sang gasolina kag diesel sa pumuluyo kag sektor sang transportasyon.
Sa idalum sang nasambit nga layi, ginahatagan sang emergency powers ang presidente agud suspendihon ukon buhinan ang excise tax sa produktong petrolyo, base sa rekomendasyon sang Development Budget Coordination Committee (DBCC) kag Department of Energy.
Ini nga tikang kasunod sang insidente sa diin ginbalabagan sang Iran ang pila ka bahin sang Strait of Hormuz nga ginaagyan sang halos 20% sang supply sang langis sa kalibutan bilang sabat sa air strikes sang Estados Unidos sang America kag Israel.
Suno kay Marcos, madugay ang pagpasar sang amo nga tikang bangud ini tuman ka komplikado rason nga kinahanglan sang ma-id-id nga kalkulasyon.
Ginabulubanta sang mga analyst nga P100 billion ang mapierde sa gobyerno kun ipatuman ang oil import tax suspension.
Magluwas sa pagpanubo sang excise tax, padayon ang paghatag sang cash aid kag fuel subsidy ang administrasyon para sa mga miyembro sang sektor sang transportasyon kag gintunga ang pamasahe sa duha ka linya sang tren sa Metro Manila.
Apang, gintawag sang pila ka transport group nga ang tikang isa lang ka “band aid solution” kag nagapanawagan nga dulaon ang value-added tax (VAT) sa gatong agud mas epektibo nga mapahaganhagan ang mataas nga presyo sini.
