ROXAS CITY – Kasubong ginabasol sa karon sang alkalde sang President Roxas ang punong barangay sang Barangay Cabug-Cabug, sang nasambit nga banwa sa natabo nga pagkaaresto sa anay alkalde nga si Don Ramon Locsin matapos nagpatigayon ini sang ‘firing’ sa Resources Services Livelihood (RSL) Center sa nasambit nga barangay.
Suno kay Mayor Receliste ‘Tanoy’ Escolin, kuntani bilang punong barangay, nahangpan na ni Kapitan Alfonso Golero nga indi mahimo nga magpatigayon sang ‘firing’ sa amo nga pasilidad bangud magluwas sa ginapanag-iyahan ini sang gobyerno, indi man ini makabig nga ‘firing range’.
Ginpahayag pa ni Escolin nga nakabaton siya sang impormasyon nga mismo si Golero ang nagtuad nga hilway ang anay alkalde nga makapatigayon sang ‘firing range’ sa nasambit nga lugar.
Gintawag pa ni Escolin nga ‘inosente’ si Locsin bangud nagpati lamang ini kay Golero.
Suno kay Escolin nga gintundaan siya sang President Roxas Municipal Police Station nga naglaong si Locsin nga magapatigayon sila sang ‘firing’ sa amo nga lugar apang ila ini nga ginbalibaran.
Gindugang pa sang alkalde nga sadtong nagapungko pa bilang alkalde sang banwa ang anak ni Ramon nga si Raymond Locsin, ginpahanugutan sini nga patukuran sang nasambit nga pasilidad ang ila nga duta.
Suno pa kay Escolin nga may gina-uyatan ini nga tax declaration kun sa diin nasaad nga ginapanag-iyahan ini sang lokal nga gobyerno sang banwa apang wala lamang ini gingamit sang nagpungko na siya sa pwesto agud makalikaw sa gamo kag may gin-assign na lamang nga caretaker agud mag-mentinar sa lugar.
Bangud diri desidido si Escolin nga pasakaan sang nagakaigo nga panumbungon si Golero bangud sa pagpahanugot sini sa pagpatigayon sang ‘firing’ ni Don Ramon sa lugar.
Mangin ang mga indibidwal nga naaktuhan nga yara sa lugar ang mahimo man mapasakaan sang panumbungon suno kay Escolin bangud sa pagsulod sa pasilidad nga wala sang pahanugot sang gobyerno.
