Madasig nga gin-aksyunan sang President Roxas Pnp ang panumbungon sang pila ka mga pumuluyo nahanungod sa mga open muffler nga mga motorsiklo.
Sa interview sang Bombo Radyo kay PMAJ. Alfred De Leon, ginpahayag nga madamu sang nagatawag, nagachat kag nagadangop mismo sa ila istasyon agud magpalab-ot sang reklamo sa mga motorista nga nagatuga sang perwisyo sa mga dalanon.
Ginpahayag ni De Leon nga ginpatigayon nila ang pagkumpiskar sang amo nga mga tambutso sadtong disyembre 31, 2024 bag-o paman ginsug-alaw ang bag-ong tuig.
Ang mga nagkaladakpan ang lunsay mga wala sang lisensya kag ang iban sini ang mga menor de edad.
Suno pa sa hepe nga boluntaryo nga ginguba kag ginlampusan sang mga motorista ang ila nga tambutso kag ginapasiguro sini nga indi na ini mapuslan pa.
Sa karon, padayon naman ang ila ginahimo nga pagbantay ukon pagmonitor sang palibot agud matapna na ang pagdamo sang nagagamit sang open muffler sa ila lugar.
