ROXAS CITY – Ginpangunahan mismo ni Presidente Rodrigo Duterte ang decommissioning sang kapin 727 ka mga katapo sang Partido ng Manggagawa-Pilipinas/Revolutionary Proletarian Army/Alex Boncayao Brigade – Tabara-Paduano Group (RPM-P/RPA/ABB-TPG) nga karon ginatawag na nga KAPATIRAN sa 3rd Infantry Division (3ID) Philippine Army sa Camp Peralta, Jamindan, Capiz.
Magluwas diri, si Presidente Duterte man ang nagpanguna sa pagdemilitarize sa 337 ka mga armas nga ginsungka sang mga anay rebelde nga yara na sa kustodiya sang mga otoridad.
Mahibaluan nga ang nasambit nga mga anay rebelde ang gikan pa sa banwa sang Maasin, Iloilo; Ibajay, Aklan; Tanjay City, Negros Oriental kag mga siyudad sang Bago, Cadiz, Kabankalan kag banwa sang Cauayan sa Negros Occidental.
Indi magnubo sa duha ka bulan nga magatinir ang mga anay rebelde sa 3ID headquarters agud magpaidalom sa training.
Matapos ang ila training pagahatagan ang mga ini sang issued firearms nga ila pagagamiton bilang miyembro sang Special Civilian Active Auxiliary (SCAA).
Kalakip sa mga benepisyo nga mabaton sang mga anay rebelde amo ang P25, 000 nga immediate cash assistance kag P50, 000 livelihood assistance gikan sa Department of Social Welfare and Development, study grant program gikan sa Commission on Higher Education, housing units sang National Housing Authority (NHA), kag madamo nga iban pa.
