DILIMAN, QUEZON CITY- Bilang kabahin sang padayon nga suporta sa ikaayong-lawas sang mga Pilipino, nagbisita si Presidente Ferdinand R. Marcos Jr. sa National Kidney and Transplant Institute (NKTI) sa Diliman, Quezon City, sa okasyon sang paglunsyar sang bag-o kag pinalapad nga benepisyo sang Philippine Health Insurance Corporation (PhilHealth) para sa mga pasyente nga nagpa-kidney transplant — kalakip na ang mga kabataan kag mga tigulang.
Ginbisita mismo ni Presidente Marcos Jr. ang mga pasyente sa Hemodialysis Center kag Hemodialysis Center Extension. Nakatalana man ini nga magpakig-angut sa pila ka mga pasyente nga naka-agum sang kidney transplant.
Sa idalom sang bag-o nga benefit package sang PhilHealth, ginpalapad ang bulig para sa mga miyembro nga may Chronic Kidney Disease (CKD) Stage 5. Lakip diri ang pagdugang sang libre nga hemodialysis sessions halin sa 90 pakadto sa 156 kada tuig, pagtaas sang Z Benefit Package para sa peritoneal dialysis tubtob P1.2 milyon, kag pagtaas sang Z Benefit para sa kidney transplantation halin sa P600,000 pakadto sa P2 milyon.
Ginpahayag man sang PhilHealth nga ang hemodialysis amo ang nangin pinaka-ginabayaran nila nga serbisyo sang 2024, nga naglab-ot sa P161 milyon ang total nga bayad para sa sini nga medical procedure.
