Nakabalik na sa Pilipinas si Presidente Ferdinand Marcos Jr matapos ang madinalag-on nga pagbisita sa US kag personal nga pagkitaay ni President Donald Trump.
Nag-abot ang Presidente sang Miyerkules sang gab-i, Hulyo 23.
Sa iya arrival statement, ginpasalig sini sa gobyerno ang bulig nga igapanagtag para sa mga apektado sang grabe nga pagbaha tuga sang mga bagyo.
Naghingyo ini sa publiko nga apektado nga magtuman sa mando sang mga otoridad.
Ginbuyagyag man sang presidente ang pila ka kadalag-an sang iya pagkit-anay kay Trump.
Sa nasambit nga sinapol, gin-istoryahan ang pila ka mga isyu sang kooperasyon sa seguridad, kalakalan kag defense cooperation.
Ginpabugal man ni Marcos nga nakatipon siya sang masobra $21 billion nga investment pledges gikan sa mga business leaders kag top executives sang nagkalain-lain nga kompaniya sa US.
Gin-agda man ni Marcos si Trump nga magbisita sa pungsod kag magtambong sa meeting sang Association of Southeast Asian Nations (ASEAN) sa tuig 2026 sa diin ang Pilipinas ang mangin host.
