Nagtambong si Maayon Mayor Raymond Malapajo, presidente sang League of Municipalities of the Philippines (LMP) Capiz chapter, sa LMP National Directorate Meeting nga ginhiwat sa Echague, Isabela.
Nag-upod man sa aktibidad sanday House Speaker Faustino Bojie Dy III kag LMP national president Mayor Faustino Inno Dy V.
Ginpahayag ni Malapajo nga produktibo ang meeting bangud naghatag ini sang kahigayunan sa mga alkalde nga mapabakod ang pagbinuligay, magpaambit sang panan-awan sa mga pagpanghangkat nga ginatubang sang local government, mas mabakod nga liderato sa lokal nga lebel, kag mas maayo nga serbisyo publiko.
Suno kay Malapajo, bilang mga local chief executive, padayon sila nga nagapangabudlay nga magbinuligay kag mapalapit ang tingog sang mga banwa sa national leadership, bangud ang mas mabakod nga mga local government unit (LGU) nagakahulugan sang mas mabakod nga komunidad kag mas mabakod nga Pilipinas.
Ang LMP nagarepresentar sa mga banwa sa bug-os nga pungsod kag nagaalagad bilang forum sa pagtalakay sang mga isyu nga may kaangtanan sa municipal administration kag sa pagpangita sang mga solusyon, sandig sa mga probisyon sang Local Government Code of 1991.
Samtang, ginpahayag man ni Malapajo nga kabahin sa iya mga tinutuyo amo ang pagtukod sang modern nga evacuation center agud masiguro ang kaluwasan sang mga pumuluyo sa tion sang mga emerhensya.
Suno sa alkalde, nagapadayon na ang structural framing, roofing kag interior finishing sang evacuation center.
