ROXAS CITY – Dako ang pagsalig sang Presidente sang Federation of Senior Citizens Association of the Philippines (FESCAP)-Capiz Chapter sa mga promesa sang gobernador sa mga senior citizen sa probinsiya.
Suno kay Mr. Isias Arboleda, (FESCAP)-Capiz Chapter president, nagpapasar sang ordinansa ang gobernador nga ang bulan sang Oktubre ang para sa mga katigulangan kadungan sang selebrasyon sang Elderly Month Celebration.
Sa amo nga selebrasyon madamo sang ginpasalig nga aktibidad si Governor Esteban Evan ‘Nonoy’ Contreras II para sa mga senior citizens.
Suno kay Arboleda nga sang nagakampanya pa si Contreras nagpasalig ini sa mga senior citizen sang libre nga medical check-up, bulong para sa ila nga maintenance kag libre nga pneumonia vaccine.
Sa karon suno kay Arboleda nagpasalig ang gobernador nga magapain ini sang kapin 4 milyones pesos nga pondo para sa mga katigulangan nga wala sang may nabaton nga social pension gikan sa Department of Social Welfare and Development (DSWD).
Magapili ang probinsya sang nagakadapat nga mga senior citizen nga magabaton sang P6, 000 kada tuig nga posible epektibo na sa masunod nga tuig 2020.
Mahibaluan nga madamo sang mga senior citizen ang nadula sa listahan sang benepisyaryo sang social pension sang DSWD matapos ang ginpatigayon nga validation sang ahensiya.
