Nagtaas ang presyo sang pila ka mga nagapanguna nga balaklon sa una nga semana sang Disyembre 2025, sandig sa datos sang Philippine Statistics Authority (PSA).
Ang average retail price sang well-milled rice naglab-ot sa P48.91 kada kilo umpisa Disyembre 1 tubtob 5, mas mataas kun ipaanggid sa P47.90 kada kilo sang ikaduha nga semana sang Nobyembre 2025 kag P47.63 kada kilo sang una nga semana sang amo man nga bulan. Subong man, mas manubo sa gihapon ini kun ipaanggid sa presyo sang Disyembre 2024 nga naglab-ot sa P54.97 kada kilo.
Nagtaas man ang presyo sang manok nga naglab-ot sa P210.67 kada kilo sa una nga semana sang Disyembre, halin sa P208.42 kada kilo sang ikaduha nga semana sang Nobyembre 2025. Mas mataas man ini kun ipaanggid sa presyo sang Disyembre 2024 nga yara sa P207.80 kada kilo.
Samtang, dako ang gintaas sang presyo sang pula nga sibuyas sa P247.44 kada kilo halin sa P208.48 sang ikaduha nga semana sang Nobyembre. Nagsaka man ang presyo sang Baguio beans sa P236.93 kada kilo, halin sa P182.78 sang ikaduha nga semana sang Nobyembre.
Suno sa PSA, ang pagtaas sang presyo ang kabahin sang normal nga pagbag-o sa presyo sang mga nagapanguna nga balaklon sa merkado kada holiday season.
