ROXAS CITY – Ginpahayag sang anay presidente sang Integrated Bar of the Philippines (IBP) Capiz chapter nga kinamatarong sang isa ka pribado nga indibidwal nga magpakita sang iya pagsuporta sa kandidato nga iya nahamut-an pinaagi sa pagpakabit sang tarpaulin sa iya pribado nga propedad, apisar malapawan pa sini ang gina-require sang Comelec nga 2”x 3” nga size.
Sa interview sang Bombo Radyo kay Atty. Remia Fuentes-Bartolome, ginsiling sini nga ang ini nga panindugan kag sang iya mga kaupdanan nga abugado sa Capiz, ang kinamatarong sang tagsa-tagsa, indi sang bisan ano nga political color.
Ini ang reaksyon sang abugado sa pagpadala sang City Comelec Office sang demand letter sa St. Anthony Hospital nga nagamandu sa ospital nga dapat kakason sa sulod sang 24-oras ang tarpaulin ni vice president Leni Robredo bangud nagalapas ini sang pagsulondan sang ahensya angut sa campaign materials.
Ginklaro ni Fuentes-Bartolome, wala ini nagakontra sa Election officer, kundi sa resolusyon sang amu nga ahensya nga kaangay sa gindali-dali sa pag-ubra.
Sandig sa omnibus election code, ginpunto sang abugado nga kun ang isa ka pribado nga persona gamit ang iya personal nga kuwarta ang magpaubra sang tarpaulin nga masobra pa sa 2”x3” nga required nga size sang Comelec, mahimo niya gid ini nga mapahamtang sa iya pribado nga propedad.
Bukas man ini nga magpamati sa bahin sang iya man mga kaangay abugado sa Comelec, agud mangin klaro sa kun ano nga layi ang dapat sundon.
