Ginadumilian ang pagpataas sang presyo sa 148 nga mga bulong sa mga lugar nga yara sa idalom sang state of calamity bangud sa mabaskog nga pag-ulan kag pagbaha tuga sang duwa ka bagyo kag habagat.
Suno sa Department of Health (DOH), ginapatuman ang price freeze ukon wala sang paghulag sa presyo sa sulod sang 60 ka-adlaw nga epektibo umpisa sang gin-anunsiyo ang state of calamity sa lokalidad magluwas na lang kun ini ang kakson sang Presidente sang timprano.
Kalakip sa price freeze ang mga bulong nga kaangay sang anaesthetics, analgesics, antiasthma, anticoagulants/antiplatelets/fibrinolytics, anticonvulsant, antidiabetic agents, antidiarrheals, antidotes, antiemetics, antihistamines, antihypertensives & anti-aginal agents, antimicrobials, antiparkinsonian drugs, antipsychotics, vitamins kag minerals kag iban pa nga mga bulong.
Para sa listahan sang iban pa nga mga bulong nga yara sa listahan sang price freeze, mahimo nga bisitahon ang website nga https://bit.ly/PriceFreezeDOH ukon ang official page sang DOH.
Inkaso man nga may mga insidente sang overpricing sa mga bulong, gilayon ini nga ireport sa DOH hotline nga (02) 8651-7800 ukon DTI Hotline: 1-384.
